居屋錦囊(二)

Posted: 28/02/2019/Under: 按揭資訊

上次同大家分享居屋按揭可以申請嘅最高成數、年期及估價等注意事項，今日會繼續同大家講下其他關於居屋按揭嘅資訊。

正常一般固定入息嘅打工仔，在向銀行申請按揭時，當然好容易提供到資料俾銀行，但是有部份居屋合資格買家，因為行業特性關係，如職業司機、建造業工人、日薪/現金收入人士，又或者係自僱人士、從事網上商店、freelance等等，都可能提供唔到入息證明俾銀行，咁銀行係咪唔會批按揭比佢哋呢？

當然唔係，因為有強大嘅政府做後盾，申請人不論購買新一手居屋或二手未補地價居屋，只要申請按揭嘅物業在居屋擔保期內，政府會對銀行作出擔保，所以即使按揭申請人未能提供入息證明，只要作出入息申報，部份銀行都能批出按揭貸款，而且申報亦可以「家庭總入息」作為基礎。

不過要注意，亦有部份銀行審批手續較為嚴謹，如沒有足夠收入，可能需要提供咨詢人及其入息證明文件。

有些居屋的申請人，可能係年齡已超過65歲嘅長者，佢地係申請按揭時會唔會比較困難呢?

其實亦都唔會嘅，因為都係有強大嘅政府做後盾，無論佢係購買一手定二手未補地價居屋，只要能夠清楚填寫好銀行申請表，亦能夠申報足夠「家庭總入息」支持供款，銀行都可以最長批出最高9成半貸款，以及25年還款期。

詳情請向銀行按揭部職員或你的按揭轉介顧問了解一下。